رد: كيفية قراءة الشاشة ودروس فى فن المضاربة
قراءة الشاشة علم وفن
للإستاذ محمود:
الفن موهبة قد توجد عند البعض وقد لا توجد
العلم يمكن تعلمه
خلونا في قراءة الشاشة كعلم
.............................................
الميكر بيطلع السوق وبينزله على كيفه
وهو أثبت لنا دائما قدرته على تغيير اتجاه السوق
مهما كان البورصجية متفائلين أو العكس
هو متحكم تماما في الجمهور ولذلك يسميه القطيع
هذه التسمية تعكس ثقته في نفسه واستعلائه على خلق الله
مفيش مشكلة
هو مسمي الجمهور قطيع لأنه يسوقه كمايرغب
يمين يمين . . وشمال شمال . . . وقف قف
أطلع ياسمسم . . انزل ياسمسم . . عرّض ياسمسم
............................................. ..... ........
والعصا التي يسوق بيها الميكر السوق هي العروض والطلبات والحواجز ( ونسميها السندات )
يوجه الميكر السوق ويقوده بالتحكم في العروض والطلبات
يمكن لك وفي بداية الجلسة أن تضع العروض والطلبات أمامك على الشاشة ومرتبة
الطلبات مرتبة تنازليا
أعلى طلب في البداية وله أولوية الشراء عن بقية الطلبات
العروض مرتبة تصاعديا
أقل عرض في البداية وله أولوية البيع عن بقيةالعروض
............................................. ..... .............................
الميكر يضع طلباته وعروضه وسط طلبات وعروض خلق الله
ولا يمكن أن نميزها
وبكميات صغيرة ولكنه يسوق بها السوق أمامه
............................................. ..... ............................
لو الميكر عايز يطلع بالسوق . . . كل شوية يشتري من العروض
اللي هي أصلا بتاعته
وياخد معاها شوية أسهم من بتوع الناس
ومش خايف لأنه ها يبيعهم تاني على سعر أغلى
لكن حتى لا يفقدالسيطرة على صعود السوق
مضطر يعطي الطلبات حتى يهدئ من نهم الشراء
وممكن الطلبات دي كمان جزء كبير منها بتاعه
وهذا يسمى التدوير
يبيع ويشتري من نفسه ولنفسه
لكن في النهاية لو عايز يطلع بالسوق
لازم الشراء يكون من العروض أكثر
ونشوف التنفيذات على الشاشة من العروض
ونلاقي العمليات التي تتم من سعر العروض أكثر عددا من التي تتم بسعرالطلبات
انظرللتنفيذات
وعد 10تنفيذات متتالية وشوف كام منهم تم بسعر العرض وكام منهم تم بسعر الطلب
لازم واحد فيهم يكون ضعف التاني أو أكتر والنسبة عادة 1:2
أقل من كده . . ارجع تاني وعد مرة تانية من الأول
ونفس الشرح السابق بس العكس لو عايز ينزل بالسوق
............................................. ..... ................................
عد 10 تنفيذات متتالية
لو أغلب التنفيذ يتم بسعر الطلب . . . السوق نازل
لو بسعر العرض . . . السوق طالع
والسوق نازل وطالع لها معاني كتيرة ومختلفة
أنا أقصد بالسوق طالع في هذا الموضع الربع ساعة القادمة
مش باقي اليوم ولا باقي الأسبوع
............................................. .....
أحيانا يحب الميكر ينزل بالسوق
بس خايف الناس تترعب وترمي
أو عايز يبيع عند سعر محدد مش أقل منه
يعني عايز ينزل أو يطلع بس السوق يكون في إيده ومايفلتش
في هذه الحالةيضع فيشة تسند غرضه
بتكون 15000 أو 25000 أو 50000
الفيشة السندة توضع في اتجاه رغبة الميكر تحريك السوق
السوق لو نازل تلاقي السندة في الطلبات
السوق لو طالع تلاقي السندة في العروض
الطلبات والعروض هما القوى المحركة للسوق
والتنفيذ هو الدخان اللي طالع من الشكمان
شوف الدخان جاي منين . . تعرف اتجاه السوق
التنفيذ لو جاي من العروض ( قوة الشراء قوية ) . .
السوق طالع والدخان جاي من الموتور اللي طالع
لكن لو التنفيذمن الطلبات ( قوى البيع قوية ) . . .
السوق نازل والدخان جاي من الموتور اللي نازل
وبتركيزك في قراءة الشاشة تتقن العملية
وكلما مر عليك الوقت اكتسبت خبرة وازدادت مهارتك وتحسنت
ولو التنفيذ يتم من الطلبات . . . يفضل تأجيل قرار الشراء قليلا
حتى تصل لسعر تعتقد أنه مناسب لك وفيه ربح قريب
ويفضل أن يكون ذلك قرب دعم من دعوم السهم
ولو التنفيذ من العروض . . يفضل تأجيل قرار البيع قليلا
حتى تصل لسعر مناسب لك
ويفضل أن يكون ذلك قريبا من مقاومة للسهم
|